ਬੋਰੀਗੱਡਾ, ਜੀਐਮ ਨਾਬਾਰਡ ਨੇ ਵਿਸ਼ੇਸ਼ ਖੇਤੀਬਾੜੀ-ਨਿਰਯਾਤ ਸਹਿਕਾਰੀ ਸਭਾਵਾਂ ਨੂੰ ਉਤਸ਼ਾਹਿਤ ਕਰਨ ਲਈ ਆਈਵਾਈਸੀ-2025 ਪ੍ਰੋਗਰਾਮ ਦਾ ਆਯੋਜਨ ਕੀਤਾ
ਬੋਰੀਗੱਡਾ, ਜੀਐਮ ਨਾਬਾਰਡ ਨੇ ਵਿਸ਼ੇਸ਼ ਖੇਤੀਬਾੜੀ-ਨਿਰਯਾਤ ਸਹਿਕਾਰੀ ਸਭਾਵਾਂ ਨੂੰ ਉਤਸ਼ਾਹਿਤ ਕਰਨ ਲਈ ਆਈਵਾਈਸੀ-2025 ਪ੍ਰੋਗਰਾਮ ਦਾ ਆਯੋਜਨ ਕੀਤਾ
ਫਿਰੋਜ਼ਪੁਰ, 27 ਅਕਤੂਬਰ 2025: ਅੰਤਰਰਾਸ਼ਟਰੀ ਸਹਿਕਾਰੀ ਵਰ੍ਹਾ (International Year of Cooperatives – IYC) 2025 ਦੀ ਪਹੁਲ ਤਹਿਤ, ਨਾਬਾਰਡ ਫਿਰੋਜ਼ਪੁਰ ਵੱਲੋਂ ਸੋਹਣਗੜ੍ਹ ਆਰਗੈਨਿਕ ਫਾਰਮਜ਼ ਵਿੱਚ ਖਾਸ ਸਹਿਕਾਰੀ ਸੰਸਥਾਵਾਂ ਨੂੰ ਪ੍ਰੋਤਸਾਹਿਤ ਕਰਨ ਲਈ ਜਾਗਰੂਕਤਾ ਅਤੇ ਸਮਰੱਥਾ ਵਿਕਾਸ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਗਿਆ। ਇਹ ਪ੍ਰੋਗਰਾਮ ਦਾਲਾਂ, ਤੇਲਹਣ ਬੀਜਾਂ, ਫਲਾਂ ਤੇ ਸਬਜ਼ੀਆਂ, ਬੀਜ ਉਤਪਾਦਨ ਅਤੇ ਖੇਤੀਬਾੜੀ ਨਿਰਯਾਤ ਨਾਲ ਸੰਬੰਧਿਤ ਸਹਿਕਾਰਤਾਵਾਂ ਦੇ ਪ੍ਰੋਤਸਾਹਨ ’ਤੇ ਕੇਂਦ੍ਰਿਤ ਸੀ।
ਇਸ ਪ੍ਰੋਗਰਾਮ ਦਾ ਉਦਘਾਟਨ ਨਾਬਾਰਡ ਦੇ ਜਨਰਲ ਮੈਨੇਜਰ ਰਮੇਸ਼ ਬਾਬੂ ਬੋਰੀਗੱਡਾ ਵੱਲੋਂ ਮੁੱਖ ਅਤਿਥੀ ਵਜੋਂ ਕੀਤਾ ਗਿਆ। ਇਸ ਮੌਕੇ ਤੇ ਕੰਵਲਜੀਤ ਸਿੰਘ (ਮਾਲਕ, ਸੋਹਣਗੜ੍ਹ ਆਰਗੈਨਿਕ ਫਾਰਮਜ਼), ਤੇਜਬੀਰ ਸਿੰਘ (ਸੀਨੀਅਰ ਮੈਨੇਜਰ, ਫਿਰੋਜ਼ਪੁਰ ਡੀ.ਸੀ.ਸੀ.ਬੀ.), ਡੀ.ਸੀ.ਸੀ.ਬੀ. ਸੋਹਣਗੜ੍ਹ ਸ਼ਾਖਾ ਦੇ ਬ੍ਰਾਂਚ ਮੈਨੇਜਰ ਤੇ ਆਡਿਟ ਇੰਸਪੈਕਟਰ, ਸਤਪਾਲ ਸਿੰਘ (ਸਕੱਤਰ, ਸੋਹਣਗੜ੍ਹ ਪੈਕਸ), ਰਵਿੰਦਰ ਕੁਮਾਰ (ਸਕੱਤਰ, ਮਹਾਂਤਾਂਵਾਲਾ ਪੈਕਸ) ਸਮੇਤ ਸਥਾਨਕ ਕਿਸਾਨਾਂ, ਕਿਸਾਨ ਉਤਪਾਦਕ ਸੰਸਥਾਵਾਂ (FPOs) ਅਤੇ ਸਵੈ ਸਹਾਇਤਾ ਗਰੁੱਪਾਂ (SHGs) ਦੇ ਮੈਂਬਰਾਂ ਨੇ ਭਾਗ ਲਿਆ। ਪ੍ਰੋਗਰਾਮ ਦਾ ਸੰਜੋਜਨ ਨਾਬਾਰਡ ਦੇ ਜ਼ਿਲ੍ਹਾ ਵਿਕਾਸ ਪ੍ਰਬੰਧਕ ਰੋਹਿਤ ਕਸ਼੍ਯਪ ਵੱਲੋਂ ਕੀਤਾ ਗਿਆ।
ਆਪਣੇ ਉਦਘਾਟਨੀ ਸੰਬੋਧਨ ਦੌਰਾਨ, ਜੀ.ਐੱਮ. ਨੇ ਭਾਰਤ ਦੀ ਸਹਿਕਾਰੀ ਚਲਾਂ ਨੂੰ ਯੂਰਪੀ ਦੇਸ਼ਾਂ ਦੇ ਮਾਪਦੰਡਾਂ ਦੇ ਸਮਾਨ ਮਜ਼ਬੂਤ ਬਣਾਉਣ ਦੀ ਲੋੜ ’ਤੇ ਜ਼ੋਰ ਦਿੱਤਾ। ਉਨ੍ਹਾਂ ਨੇ ਚੰਗੇ ਪ੍ਰਬੰਧਨ, ਪੈਮਾਨੇ, ਗੁਣਵੱਤਾ ਪ੍ਰਣਾਲੀਆਂ ਅਤੇ ਨਿਰਯਾਤ-ਕੇਂਦ੍ਰਿਤ ਦ੍ਰਿਸ਼ਟੀਕੋਣ ਦੀ ਮਹੱਤਤਾ ਉਤੇ ਰੋਸ਼ਨੀ ਪਾਈ। ਉਨ੍ਹਾਂ ਨੇ ਕਿਸਾਨਾਂ ਅਤੇ ਹੋਰ ਹਿੱਸੇਦਾਰਾਂ ਨੂੰ ਆਰਗੈਨਿਕ ਖੇਤੀ ਅਪਣਾਉਣ ਲਈ ਪ੍ਰੇਰਿਤ ਕੀਤਾ ਅਤੇ ਸੋਹਣਗੜ੍ਹ ਆਰਗੈਨਿਕ ਫਾਰਮਜ਼ ਦੇ ਮਾਡਲ ਦੀ ਸਰਾਹਨਾ ਕੀਤੀ, ਜੋ “ਬਿਨਾ ਬਾਹਰੀ ਪੋਸ਼ਣ”, “ਬਿਨਾ ਕਚਰਾ ਨਿਕਾਸ” ਅਤੇ “ਫਾਰਮ ਅਵਸ਼ੇਸ਼ਾਂ ਦੀ ਪੂਰੀ ਰੀਸਾਇਕਲਿੰਗ” ਦੇ ਸਿਧਾਂਤਾਂ ’ਤੇ ਆਧਾਰਿਤ ਹੈ, ਜੋ ਮਿੱਟੀ ਦੀ ਉਰਵਰਤਾ ਨੂੰ ਬਣਾਈ ਰੱਖਣ ਵਿੱਚ ਮਦਦ ਕਰਦਾ ਹੈ।
ਜ਼ਿਲ੍ਹਾ ਵਿਕਾਸ ਪ੍ਰਬੰਧਕ, ਰੋਹਿਤ ਕਸ਼੍ਯਪ ਨੇ ਸਹਿਕਾਰੀ ਸੰਸਥਾਵਾਂ ਦੀ ਭੂਮਿਕਾ ਨੂੰ ਸਮਾਵੇਸ਼ੀ ਅਤੇ ਬਾਜ਼ਾਰ-ਕੇਂਦ੍ਰਿਤ ਖੇਤੀਬਾੜੀ ਵਿਕਾਸ ਵਿੱਚ ਅਹਿਮ ਦੱਸਿਆ। ਉਨ੍ਹਾਂ ਨੇ ਨਾਬਾਰਡ ਵੱਲੋਂ ਸਹਿਕਾਰੀ ਖੇਤਰ ਵਿੱਚ ਕੀਤੀਆਂ ਵੱਖ-ਵੱਖ ਪਹਲਾਂ ਜਿਵੇਂ ਕਿ ਕਰਜ਼ਾ ਅਤੇ ਇੰਫਰਾਸਟਰਕਚਰ ਸਹਾਇਤਾ, ਪੈਕਸ ਅਧੁਨਿਕੀਕਰਨ, ਵੈਲਿਊ-ਚੇਨ ਫਾਇਨੈਂਸਿੰਗ, ਮਾਰਕੀਟਿੰਗ ਲਿੰਕੇਜ ਤੇ ਸਮਰੱਥਾ ਵਿਕਾਸ ਬਾਰੇ ਜਾਣਕਾਰੀ ਦਿੱਤੀ।
ਵਿਚਾਰ-ਵਟਾਂਦਰੇ ਦੌਰਾਨ ਕਲੱਸਟਰ ਬਣਾਉਣ, ਇਕੱਠ, ਪ੍ਰਾਇਮਰੀ ਪ੍ਰੋਸੈਸਿੰਗ, ਬ੍ਰਾਂਡਿੰਗ, ਸਰਟੀਫਿਕੇਸ਼ਨ, ਲਾਜਿਸਟਿਕਸ ਅਤੇ ਨਿਰਯਾਤ ਯੋਗ ਉਤਪਾਦਕ ਸੰਗਠਨਾਂ ਦੇ ਵਿਕਾਸ ’ਤੇ ਵਿਚਾਰ ਕੀਤਾ ਗਿਆ। ਅੰਤ ਵਿੱਚ, ਹਿੱਸੇਦਾਰਾਂ ਨੇ ਪ੍ਰੋਸੈਸਿੰਗ, ਰੂਰਲ ਮਾਰਟ/ਕਲੇਕਸ਼ਨ ਸੈਂਟਰਾਂ ਦੀ ਸਥਾਪਨਾ ਅਤੇ ਨਿਰਯਾਤ ਬਾਜ਼ਾਰਾਂ ਨਾਲ ਸੰਪਰਕ ਲਈ ਵਿਸ਼ੇਸ਼ ਸਹਿਕਾਰੀ ਸੰਸਥਾਵਾਂ ਬਣਾਉਣ ਦੀ ਲੋੜ ’ਤੇ ਸਹਿਮਤੀ ਜਤਾਈ।
