ਕੁਦਰਤੀ ਆਫ਼ਤਾਂ ,ਹਾਦਸਿਆਂ ਅਤੇ ਸੰਭਾਵੀ ਜੰਗ ਲਈ ਹਰ ਨਾਗਰਿਕ ਲਵੇ ‘ਸਿਵਲ ਡਿਫੈਂਸ ’ ਟ੍ਰੇਨਿੰਗ ਬਲੈਕਆਊਟ ਅਤੇ ਚੇਤਾਵਨੀ ਸਾਇਰਨਾਂ ਦੀ ਮਹੱਤਤਾ ਨੂੰ ਸਮਝਣਾ ਸਮੇਂ ਦੀ ਅਹਿਮ ਲੋੜ;ਗੁਰਲਵਦੀਪ ਸਿੰਘ ,ਜ਼ਿਲ੍ਹਾ ਕਮਾਂਡੈਂਟ

ਕੁਦਰਤੀ ਆਫ਼ਤਾਂ ,ਹਾਦਸਿਆਂ ਅਤੇ ਸੰਭਾਵੀ ਜੰਗ ਲਈ ਹਰ ਨਾਗਰਿਕ ਲਵੇ ‘ਸਿਵਲ ਡਿਫੈਂਸ ’ ਟ੍ਰੇਨਿੰਗ ਬਲੈਕਆਊਟ ਅਤੇ ਚੇਤਾਵਨੀ ਸਾਇਰਨਾਂ ਦੀ ਮਹੱਤਤਾ ਨੂੰ ਸਮਝਣਾ ਸਮੇਂ ਦੀ ਅਹਿਮ ਲੋੜ;ਗੁਰਲਵਦੀਪ ਸਿੰਘ ,ਜ਼ਿਲ੍ਹਾ ਕਮਾਂਡੈਂਟ
———————————————

ਫਿਰੋਜ਼ਪੁਰ; ਦੇਸ਼ ਭਰ ਵਿੱਚ ਸਿਵਡ ਡਿਫੈਂਸ ਵੱਲੋਂ ਹੋਣ ਵਾਲੀ ‘ਏਅਰ ਰੇਡ ਬਲੈਕ ਆਉਟ ’ ਮੌਕ ਡਰਿੱਲ ਸਬੰਧੀ ਪੰਜਾਬ ਹੋਮਗਾਰਡ ਦੇ ਜ਼ਿਲ੍ਹਾ ਕਮਾਂਡੈਂਟ ਅਤੇ ਸਿਵਲ ਡਿਫੈਂਸ ਅਧਿਕਾਰੀ ਗੁਰਲਵਦੀਪ ਸਿੰਘ ਨੇ ਹਰ ਨਾਗਰਿਕ ਨੂੰ ਅਪੀਲ ਕੀਤੀ ਕਿ ‘‘ ਬਲੈਕਆਊਟ ਅਤੇ ਚੇਤਾਵਨੀ ਸਾਇਰਨਾਂ ਦੀ ਮਹੱਤਤਾ ਨੂੰ ਸਮਝਣਾ ਸਮੇਂ ਦੀ ਅਹਿਮ ਲੋੜ ਹੈ।’’ ਉਨ੍ਹਾਂ ਦੱਸਿਆ ਕਿ ਨਾਗਰਿਕ ਸੁਰੱਖਿਆ (ਸਿਵਲ ਡਿਫੈਂਸ) ਅਭਿਆਸਾਂ ਦਾ ਉਦੇਸ਼ ਐਮਰਜੈਂਸੀ ਦੌਰਾਨ ਨਾਗਰਿਕਾਂ ਅਤੇ ਪ੍ਰਸ਼ਾਸਨ ਨੂੰ ਸ਼ਾਂਤ ਅਤੇ ਪ੍ਰਭਾਵਸ਼ਾਲੀ ਢੰਗ ਨਾਲ ਕੰਮ ਕਰਨ ਲਈ ਤਿਆਰ ਕਰਨਾ ਹੈ।
ਜ਼ਿਲ੍ਹਾ ਕਮਾਂਡੈਂਟ ਗੁਰਲਵਦੀਪ ਸਿੰਘ ਨੇ ਦੱਸਿਆ ਕਿ ਅਨਿਸ਼ਚਿਤਤਾ ਦੇ ਇਸ ਦੌਰ ਵਿੱਚ, ਜਿੱਥੇ ਤਿਆਰੀ ਹੀ ਸੁਰੱਖਿਆ ਦੀ ਕੁੰਜੀ ਹੈ, ਉੱਥੇ ਨਾਗਰਿਕ ਸੁਰੱਖਿਆ (ਸਿਵਲ ਡਿਫੈਂਸ) ਐਮਰਜੈਂਸੀ ਦੌਰਾਨ ਜਾਨ-ਮਾਲ ਦੀ ਰਾਖੀ ਲਈ ਅਹਿਮ ਭੂਮਿਕਾ ਨਿਭਾਉਂਦੀ ਹੈ। ਸਿਖਲਾਈ, ਜਨਤਕ ਜਾਗਰੂਕਤਾ ਅਤੇ ਨਿਯਮਤ ਅਭਿਆਸਾਂ (ਮੌਕ ਡਰਿੱਲ) ਰਾਹੀਂ, ਸਿਵਲ ਡਿਫੈਂਸ ਇਹ ਯਕੀਨੀ ਬਣਾਉਂਦਾ ਹੈ ਕਿ ਅਧਿਕਾਰੀ ਅਤੇ ਨਾਗਰਿਕ ਸੰਕਟ ਦੇ ਸਮੇਂ ਪ੍ਰਭਾਵਸ਼ਾਲੀ ਢੰਗ ਨਾਲ ਕਾਰਵਾਈ ਕਰਨ ਲਈ ਤਿਆਰ ਰਹਿਣ।
ਜ਼ਿਲ੍ਹਾ ਕਮਾਂਡੈਂਟ ਨੇ ਦੱਸਿਆ ਕਿ ਪੰਜਾਬ ਵਿੱਚ ਸਿਵਲ ਡਿਫੈਂਸ, ਡਾਇਰੈਕਟਰ ਜਨਰਲ ਆਫ ਪੁਲਿਸ ਦੀ ਨਿਗਰਾਨੀ ਹੇਠ ਕੰਮ ਕਰਦੀ ਹੈ, ਜੋ ਹੋਮ ਗਾਰਡਜ਼ ਦੇ ਕਮਾਂਡੈਂਟ ਜਨਰਲ ਅਤੇ ਸਿਵਲ ਡਿਫੈਂਸ ਪੰਜਾਬ ਦੇ ਐਕਸ-ਆਫਿਸ਼ੀਓ ਡਾਇਰੈਕਟਰ ਵਜੋਂ ਵੀ ਸੇਵਾਵਾਂ ਨਿਭਾਉਂਦੇ ਹਨ। ਇਹ ਸੰਸਥਾ ਸਿਵਲ ਡਿਫੈਂਸ ਐਕਟ, 1968 ਦੇ ਤਹਿਤ ਕੰਮ ਕਰਦੀ ਹੈ, ਜੋ ਅਧਿਕਾਰੀਆਂ ਨੂੰ ਦੁਸ਼ਮਣ ਦੇ ਹਮਲਿਆਂ, ਕੁਦਰਤੀ ਆਫ਼ਤਾਂ ਅਤੇ ਹੋਰ ਐਮਰਜੈਂਸੀ ਦੌਰਾਨ ਜਨਤਕ ਸੁਰੱਖਿਆ ਉਪਾਅ ਲਾਗੂ ਕਰਨ ਦਾ ਅਧਿਕਾਰ ਦਿੰਦੀ ਹੈ।
ਸਿਵਲ ਡਿਫੈਂਸ ਦਾ ਮੁੱਖ ਉਦੇਸ਼ ਜਾਨਾਂ ਬਚਾਉਣਾ, ਜਾਇਦਾਦ ਦੇ ਨੁਕਸਾਨ ਨੂੰ ਘੱਟ ਕਰਨਾ ਅਤੇ ਨਾਗਰਿਕਾਂ ਨੂੰ ਐਮਰਜੈਂਸੀ ਦੌਰਾਨ ਸਹੀ ਜਵਾਬ ਦੇਣ ਲਈ ਸਿਖਲਾਈ ਦੇਣਾ ਹੈ। ਇਹ ਅਨੁਸ਼ਾਸਿਤ ਸਿਖਲਾਈ, ਪ੍ਰਸ਼ਾਸਨਿਕ ਵਿਭਾਗਾਂ ਵਿਚਕਾਰ ਤਾਲਮੇਲ ਅਤੇ ਫਸਟ-ਏਡ ਟੀਮਾਂ, ਫਾਇਰ ਸਰਵਿਸਿਜ਼ ਅਤੇ ਬਚਾਅ ਯੂਨਿਟਾਂ ਦੀ ਤੁਰੰਤ ਕਾਰਵਾਈ ਰਾਹੀਂ ਪ੍ਰਾਪਤ ਕੀਤਾ ਜਾਂਦਾ ਹੈ।
———————————————
ਲਾਲ ਅਤੇ ਹਰੇ ਰੰਗ ਦੇ ਚੇਤਾਵਨੀ ਸਿਗਨਲ
—-ਸਿਵਲ ਡਿਫੈਂਸ ਸੰਭਾਵੀ ਖਤਰਿਆਂ ਬਾਰੇ ਜਨਤਾ ਨੂੰ ਸੁਚੇਤ ਕਰਨ ਲਈ ਸਾਇਰਨ ਦੀ ਵਰਤੋਂ ਕਰਦੀ ਹੈ। ਇਸ ਦੌਰਾਨ ਲਾਲ ਚੇਤਾਵਨੀ (ਰੈਡ ਸਿਗਨਲ ): ਲਗਭਗ ਦੋ ਮਿੰਟਾਂ ਲਈ ਵੱਜਣ ਵਾਲਾ ਉੱਚੀ ਅਤੇ ਨੀਵੀਂ ਪਿੱਚ (ਉਤਾਰ-ਚੜ੍ਹਾਅ ਵਾਲਾ) ਦਾ ਸਾਇਰਨ ‘ਲਾਲ ਚੇਤਾਵਨੀ’ ਦਾ ਸੰਕੇਤ ਦਿੰਦਾ ਹੈ। ਇਹ ਸੰਭਾਵੀ ਖਤਰੇ ਨੂੰ ਦਰਸਾਉਂਦਾ ਹੈ, ਜਿਵੇਂ ਕਿ ਸਾਡੀ ਹਵਾਈ ਸਰਹੱਦ ਵਿੱਚ ਦੁਸ਼ਮਣ ਦੇ ਜਹਾਜ਼ ਦਾ ਦਾਖਲ ਹੋਣਾ ਅਤੇ ਹਮਲੇ ਦਾ ਖਦਸ਼ਾ।
ਹਰਾ ਸਿਗਨਲ: ਜਦੋਂ ਖਤਰਾ ਟਲ ਜਾਂਦਾ ਹੈ, ਤਾਂ ਦੋ ਮਿੰਟਾਂ ਲਈ ਲਗਾਤਾਰ ਇੱਕੋ ਜਿਹੀ ਉੱਚੀ ਆਵਾਜ਼ ਵਾਲਾ ਸਾਇਰਨ ਵਜਾਇਆ ਜਾਂਦਾ ਹੈ। ਇਹ ਹਰਾ ਸਿਗਨਲ ਦਰਸਾਉਂਦਾ ਹੈ ਕਿ ਸਥਿਤੀ ਹੁਣ ਸੁਰੱਖਿਅਤ ਹੈ ਅਤੇ ਆਮ ਆਵਾਜਾਈ ਮੁੜ ਸ਼ੁਰੂ ਕੀਤੀ ਜਾ ਸਕਦੀ ਹੈ।
———————————————
ਬਲੈਕਆਊਟ ਕੀ ਹੈ?
ਬਲੈਕਆਊਟ ਦਾ ਮਤਲਬ ਹੈ ਸਾਰੀਆਂ ਲਾਈਟਾਂ ਬੰਦ ਕਰਨਾ ਅਤੇ ਇਹ ਯਕੀਨੀ ਬਣਾਉਣਾ ਕਿ ਇਮਾਰਤਾਂ ਜਾਂ ਵਾਹਨਾਂ ਵਿੱਚੋਂ ਕੋਈ ਵੀ ਰੌਸ਼ਨੀ ਬਾਹਰ ਨਾ ਨਿਕਲੇ। ਖਿੜਕੀਆਂ ਨੂੰ ਢੱਕਿਆ ਜਾ ਸੱਕਦਾ ਹੈ ਅਤੇ ਜੇਕਰ ਲੋੜ ਹੋਵੇ ਤਾਂ ਵਾਹਨਾਂ ਦੀਆਂ ਹੈੱਡਲਾਈਟਾਂ ਵੀ ਬੰਦ ਕਰ ਦਿੱਤੀਆਂ ਜਾਂਦੀਆਂ ਹਨ। ਇਸ ਦਾ ਉਦੇਸ਼ ਦੁਸ਼ਮਣ ਦੇ ਜਹਾਜ਼ਾਂ ਤੋਂ ਟਿਕਾਣਿਆਂ ਨੂੰ ਛੁਪਾਉਣਾ ਅਤੇ ਹਮਲੇ ਦੇ ਜੋਖਮ ਨੂੰ ਘੱਟ ਕਰਨਾ ਹੈ।
———————————————
ਬੁਨਿਆਦੀ ਢਾਂਚੇ ਅਤੇ ਸਿਖਲਾਈ ਪ੍ਰਾਪਤ ਮਨੁੱਖੀ ਸ਼ਕਤੀ ਦਾ ਮੁਲਾਂਕਣ ਕਰਨ ਲਈ ਇਕ ਰੂਟੀਨ ਅਭਿਆਸ
—ਤਿਆਰੀਆਂ ਨੂੰ ਮਜ਼ਬੂਤ ਕਰਨ ਲਈ, ‘ਆਪ੍ਰੇਸ਼ਨ ਸਿੰਧੂਰ’ ਤੋਂ ਬਾਅਦ ਦੇਸ਼ ਭਰ ਵਿੱਚ ਸਿਵਲ ਡਿਫੈਂਸ ਸਿਖਲਾਈ ਪ੍ਰੋਗਰਾਮ ਚਲਾਏ ਗਏ ਹਨ। ਇਨ੍ਹਾਂ ਉਪਰਾਲਿਆਂ ਨੇ ਇੱਕ ਸਿਖਲਾਈ ਪ੍ਰਾਪਤ ਅਤੇ ਸਮਰੱਥ ਵਲੰਟੀਅਰ ਫੋਰਸ ਤਿਆਰ ਕਰਨ ਵਿੱਚ ਮਦਦ ਕੀਤੀ ਹੈ, ਜੋ ਐਮਰਜੈਂਸੀ ਦੌਰਾਨ ਅਧਿਕਾਰੀਆਂ ਦੀ ਸਹਾਇਤਾ ਲਈ ਤਿਆਰ ਹੈ। ਭਾਰਤ ਸਰਕਾਰ ਨੇ ਨਿਰਦੇਸ਼ ਦਿੱਤੇ ਹਨ ਕਿ ਸਿਵਲ ਡਿਫੈਂਸ ਅਭਿਆਸ ਸਾਲ ਵਿੱਚ ਦੋ ਵਾਰ, ਅਪ੍ਰੈਲ ਅਤੇ ਨਵੰਬਰ ਵਿੱਚ ਕਰਵਾਏ ਜਾਣ, ਤਾਂ ਜੋ ਤਿਆਰੀਆਂ, ਤਾਲਮੇਲ ਅਤੇ ਜਵਾਬੀ ਪ੍ਰਣਾਲੀਆਂ ਦਾ ਨਿਯਮਤ ਮੁਲਾਂਕਣ ਕੀਤਾ ਜਾ ਸਕੇ।
ਮੌਜੂਦਾ ਸਿਵਲ ਡਿਫੈਂਸ ਅਭਿਆਸ ਇੱਕ ਰੁਟੀਨ ਤਿਆਰੀ ਡਰਿੱਲ ਹੈ ਜੋ ਤਾਲਮੇਲ, ਬੁਨਿਆਦੀ ਢਾਂਚੇ ਅਤੇ ਸਿਖਲਾਈ ਪ੍ਰਾਪਤ ਮਨੁੱਖੀ ਸ਼ਕਤੀ ਦਾ ਮੁਲਾਂਕਣ ਕਰਨ ਲਈ ਤਿਆਰ ਕੀਤੀ ਗਈ ਹੈ। ਅਜਿਹੇ ਅਭਿਆਸ ਇਹ ਯਕੀਨੀ ਬਣਾਉਣ ਵਿੱਚ ਮਦਦ ਕਰਦੇ ਹਨ ਕਿ ਸਿਸਟਮ ਐਮਰਜੈਂਸੀ ਦੀ ਸਥਿਤੀ ਵਿੱਚ ਪ੍ਰਭਾਵਸ਼ਾਲੀ ਢੰਗ ਨਾਲ ਕੰਮ ਕਰਨ ਲਈ ਤਿਆਰ ਰਹਿਣ।
ਪੰਜਾਬ ਦੇ ਲੋਕਾਂ ਨੇ ਹਮੇਸ਼ਾ ਚੁਣੌਤੀਪੂਰਨ ਸਮਿਆਂ ਦੌਰਾਨ ਦਲੇਰੀ ਅਤੇ ਦ੍ਰਿੜਤਾ ਦਿਖਾਈ ਹੈ। ਸਾਡੀ ਸਮੂਹਿਕ ਤਿਆਰੀ ਨੂੰ ਮਜ਼ਬੂਤ ਕਰਨ ਲਈ ਜਨਤਕ ਜਾਗਰੂਕਤਾ ਅਤੇ ਭਾਗੀਦਾਰੀ ਜ਼ਰੂਰੀ ਹੈ। ਨਾਗਰਿਕਾਂ ਨੂੰ ਉਤਸ਼ਾਹਿਤ ਕੀਤਾ ਜਾਂਦਾ ਹੈ ਕਿ ਉਹ ਵਲੰਟੀਅਰਾਂ ਵਜੋਂ ਸਿਵਲ ਡਿਫੈਂਸ ਵਿੱਚ ਸ਼ਾਮਲ ਹੋਣ ਅਤੇ ਦੇਸ਼ ਦੀ ਸੁਰੱਖਿਆ ਵਿੱਚ ਆਪਣਾ ਯੋਗਦਾਨ ਪਾਉਣ।