ਫਿਰੋਜ਼ਪੁਰ ਦੇ ਲੋਕਾਂ ਦੀ ਆਵਾਜ਼ ਬਣਨ ਲਈ ਅਕਾਲੀ ਦਲ ਨਾਲ ਜੁੜੇ ਸੁਖਪਾਲ ਸਿੰਘ ਨੰਨੂ ਸਾਬਕਾ ਐਮ ਐਲ ਏ
ਫਿਰੋਜ਼ਪੁਰ ਦੇ ਲੋਕਾਂ ਦੀ ਆਵਾਜ਼ ਬਣਨ ਲਈ ਅਕਾਲੀ ਦਲ ਨਾਲ ਜੁੜੇ ਸੁਖਪਾਲ ਸਿੰਘ ਨੰਨੂ ਸਾਬਕਾ ਐਮ ਐਲ ਏ
ਹਰੀਸ਼ ਮੋਂਗਾ
ਫਿਰੋਜ਼ਪੁਰ, ਅਕਤੂਬਰ 13, 2025: ਦੋ ਵਾਰ ਫਿਰੋਜ਼ਪੁਰ ਤੋਂ ਭਾਜਪਾ ਦੇ ਟਿਕਟ ‘ਤੇ ਵਿਧਾਇਕ ਰਹਿ ਚੁੱਕੇ ਨੇਤਾ, ਸੁਖਪਾਲ ਸਿੰਘ ਨੰਨੂ, ਜੋ ਬਾਅਦ ਵਿੱਚ ਆਮ ਆਦਮੀ ਪਾਰਟੀ ਵਿੱਚ ਵੀ ਰਹੇ, ਹੁਣ ਸੁਖਬੀਰ ਸਿੰਘ ਬਾਦਲ ਦੀ ਮੌਜੂਦਗੀ ਵਿੱਚ ਸ਼ਿਰੋਮਣੀ ਅਕਾਲੀ ਦਲ (ਬਾਦਲ) ਵਿੱਚ ਸ਼ਾਮਲ ਹੋ ਗਏ ਹਨ।
ਉਹਨਾਂ ਨੇ ਕਿਹਾ ਕਿ ਅਪਣੀ ਵਿਧਾਇਕੀ ਦੌਰਾਨ ਇਲਾਕੇ ਵਿੱਚ ਵਿਕਾਸ ਕਾਰਜ ਕਰਨ ਵਿੱਚ ਬਾਦਲ ਪਰਿਵਾਰ ਦਾ ਵੱਡਾ ਯੋਗਦਾਨ ਰਿਹਾ। ਸੜਕਾਂ ਤੋਂ ਲੈ ਕੇ ਪੱਟੀ–ਫੁੱਲ ਪੁਲ ਤੱਕ ਦੀ ਮੰਗ ਨੂੰ ਸੁਖਬੀਰ ਸਿੰਘ ਬਾਦਲ ਨੇ ਮਨਜ਼ੂਰੀ ਦਿੱਤੀ ਜਿਸ ਨਾਲ ਲੋਕਾਂ ਨੂੰ ਵੱਡਾ ਲਾਭ ਮਿਲਿਆ। ਉਹਨਾਂ ਦੇ ਅਨੁਸਾਰ, ਖੇਤਰੀ ਪਾਰਟੀਆਂ ਹੀ ਲੋਕਲ ਲੋੜਾਂ ਨੂੰ ਸਮਝ ਕੇ ਕੰਮ ਕਰ ਸਕਦੀਆਂ ਹਨ, ਜਦਕਿ ਦਿੱਲੀ-ਕੇਂਦਰਿਤ ਪਾਰਟੀਆਂ ਵਿੱਚ ਇਹ ਸੰਭਵ ਨਹੀਂ।
ਸਾਬਕਾ ਵਿਧਾਇਕ ਨੇ ਆਮ ਆਦਮੀ ਪਾਰਟੀ ਨੂੰ ਛੱਡਣ ਦਾ ਕਾਰਨ ਵੀ ਸਾਫ ਕੀਤਾ। ਉਹਨਾਂ ਕਿਹਾ ਕਿ ਉਸ ਪਾਰਟੀ ਵਿੱਚ ਨਾ ਤਾਂ ਲੋਕਲ ਨੇਤਾਵਾਂ ਦੀ ਕੋਈ ਸੁਣਵਾਈ ਹੈ ਅਤੇ ਨਾ ਹੀ ਵਰਕਰਾਂ ਦੇ ਕੰਮ ਹੁੰਦੇ ਹਨ। ਹਰ ਛੋਟੇ ਤੋਂ ਛੋਟਾ ਕੰਮ ਕਰਵਾਉਣ ਲਈ ਵੀ ਦਿੱਲੀ ਦੀ ਮਨਜ਼ੂਰੀ ਲੈਣੀ ਪੈਂਦੀ ਹੈ, ਜਿਸ ਨਾਲ ਲੋਕ ਨਿਰਾਸ਼ ਹਨ।
ਉਹਨਾਂ ਦੋਸ਼ ਲਗਾਇਆ ਕਿ ਪਿਛਲੇ 10 ਸਾਲਾਂ ਵਿੱਚ ਕਾਂਗਰਸ ਜਾਂ ਆਮ ਆਦਮੀ ਪਾਰਟੀ ਦੀ ਸਰਕਾਰਾਂ ਨੇ ਫਿਰੋਜ਼ਪੁਰ ਦੇ ਇਲਾਕੇ ਲਈ ਕੋਈ ਵੱਡਾ ਵਿਕਾਸ ਨਹੀਂ ਕੀਤਾ। “ਮੇਰੇ ਟਰਮ ਦੌਰਾਨ ਇਲਾਕੇ ਨੂੰ ਹੜ੍ਹ ਤੋਂ ਬਚਾਉਣ ਲਈ ਬੰਨ੍ਹਾਂ ਦੀ ਮੁਰੰਮਤ ਕਰਾਈ ਗਈ ਅਤੇ ਮਾਈਨਿੰਗ ‘ਤੇ ਰੋਕ ਲਗਾਈ। ਪਰ ਮੇਰੇ ਬਾਅਦ ਕੋਈ ਕੰਮ ਨਹੀਂ ਹੋਇਆ, ਸਗੋਂ ਰੇਤ ਮਾਈਨਿੰਗ ਨਾਲ ਇਲਾਕਾ ਹੋਰ ਖਰਾਬ ਹੋਇਆ,” ਉਹਨਾਂ ਕਿਹਾ।
ਉਹਨਾਂ 22 ਕਰੋੜ ਰੁਪਏ ਦੇ ਮੁਆਵਜ਼ੇ ਵਿੱਚ ਘਪਲੇ ਦਾ ਮਾਮਲਾ ਵੀ ਚੁੱਕਿਆ। ਉਹਨਾਂ ਦੇ ਮੁਤਾਬਕ, ਇਲਾਕੇ ਦੇ ਹੱਕ ਦਾ ਪੈਸਾ ਗਬਨ ਹੋ ਗਿਆ ਪਰ ਨਾ ਹੀ ਸਥਾਨਕ ਐਮਐਲਏ ਅਤੇ ਨਾ ਹੀ ਸਰਕਾਰ ਨੇ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲਿਆ। “ਜਦੋਂ ਲੀਡਰ ਹੀ ਆਵਾਜ਼ ਨਹੀਂ ਉਠਾਉਂਦੇ ਤਾਂ ਲੋਕ ਕਿੱਥੇ ਜਾਣ?” ਉਹਨਾਂ ਸਵਾਲ ਕੀਤਾ।
ਸਾਬਕਾ ਵਿਧਾਇਕ ਨੇ ਦਾਅਵਾ ਕੀਤਾ ਕਿ ਉਹਨਾਂ ਦਾ ਇਕੋ ਮਕਸਦ ਪਾਰਟੀ ਦੇ ਵਰਕਰਾਂ ਦੀ ਇੱਜ਼ਤ ਬਚਾਉਣਾ ਅਤੇ ਫਿਰੋਜ਼ਪੁਰ ਦੀ ਆਵਾਜ਼ ਬਣਨਾ ਹੈ। “ਇਹ ਚੋਣ ਮੇਰੀ ਨਹੀਂ, ਫਿਰੋਜ਼ਪੁਰ ਦੇ ਲੋਕਾਂ ਦੀ ਹੈ। ਗੁੰਡਾਗਰਦੀ ਅਤੇ ਲੁੱਟ–ਖੋਹ ਦੇ ਮਾਹੌਲ ਵਿੱਚ ਜਦੋਂ ਸਰਕਾਰਾਂ ਚੁੱਪ ਹਨ, ਤਾਂ ਅਕਾਲੀ ਦਲ ਹੀ ਲੋਕਾਂ ਦੇ ਹੱਕ ਲਈ ਖੜ੍ਹਾ ਹੋਵੇਗਾ,” ਉਹਨਾਂ ਕਿਹਾ।
