7ਵਾਂ ਮਯੰਕ ਸ਼ਰਮਾ ਯਾਦਗਾਰੀ ਪੇਂਟਿੰਗ ਮੁਕਾਬਲਾ 14 ਅਪ੍ਰੈਲ ਨੂੰ 

7ਵਾਂ ਮਯੰਕ ਸ਼ਰਮਾ ਯਾਦਗਾਰੀ ਪੇਂਟਿੰਗ ਮੁਕਾਬਲਾ 14 ਅਪ੍ਰੈਲ ਨੂੰ

 ਸੜਕ ਸੁਰੱਖਿਆ, ਲੋਕਤੰਤਰ ਦਾ ਤਿਉਹਾਰ, ਜ਼ਿੰਦਗੀ ਦੇ ਰੰਗ, ਫਿਰੋਜ਼ਪੁਰ ਦੀ ਵਿਰਾਸਤ, ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਹੋਣਗੇ ਥੀਮ

 ਫ਼ਿਰੋਜ਼ਪੁਰ 9 ਅਪ੍ਰੈਲ, 2024:

ਮਯੰਕ ਸ਼ਰਮਾ ਦੀ ਯਾਦ ਵਿੱਚ ਹਰ ਸਾਲ ਦੀ ਤਰ੍ਹਾਂ ਮਯੰਕ ਫਾਊਂਡੇਸ਼ਨ ਵੱਲੋਂ 7ਵਾਂ ਮਯੰਕ ਸ਼ਰਮਾ ਯਾਦਗਾਰੀ ਪੇਂਟਿੰਗ ਮੁਕਾਬਲਾ 14 ਅਪ੍ਰੈਲ ਦਿਨ ਐਤਵਾਰ ਨੂੰ ਗਾਂਧੀ ਗਾਰਡਨ ਫ਼ਿਰੋਜ਼ਪੁਰ ਛਾਉਣੀ ਵਿਖੇ ਕਰਵਾਇਆ ਜਾ ਰਿਹਾ ਹੈ।

 ਪ੍ਰੋਜੈਕਟ ਚੇਅਰਮੈਨ ਵਿਕਾਸ ਗੁੰਬਰ ਨੇ ਦੱਸਿਆ ਕਿ ਇਸ ਮੁਕਾਬਲੇ ਵਿੱਚ ਦਾਖਲਾ ਮੁਫਤ ਹੈ, ਜਿਸ ਵਿੱਚ 1500 ਦੇ ਕਰੀਬ ਪ੍ਰਤੀਯੋਗੀ ਭਾਗ ਲੈਣਗੇ। ਇਸ ਮੁਕਾਬਲੇ ਵਿੱਚ ਕੁੱਲ 5 ਸ਼੍ਰੇਣੀਆਂ ਰੱਖੀਆਂ ਗਈਆਂ ਹਨ। ਪਹਿਲੀ ਸ਼੍ਰੇਣੀ 1-3 ਜਮਾਤ, ਦੂਜੀ ਸ਼੍ਰੇਣੀ 4-5, ਤੀਜੀ ਸ਼੍ਰੇਣੀ 6-8, ਚੌਥੀ ਸ਼੍ਰੇਣੀ 9ਵੀਂ ਤੋਂ 12ਵੀਂ ਜਮਾਤ ਅਤੇ ਪੰਜਵੀਂ ਓਪਨ ਸ਼੍ਰੇਣੀ ਹੈ ਜਿਸ ਵਿੱਚ ਕਿਸੇ ਵੀ ਉਮਰ ਵਰਗ ਦੇ ਚਿੱਤਰਕਾਰ ਭਾਗ ਲੈ ਸਕਦੇ ਹਨ।

 ਪ੍ਰੋਜੈਕਟ ਕੋਆਰਡੀਨੇਟਰ ਦੀਪਕ ਮਠਪਾਲ ਅਤੇ ਅਮਿਤ ਆਨੰਦ ਨੇ ਦੱਸਿਆ ਕਿ ਹਰੇਕ ਵਰਗ ਲਈ ਵੱਖ-ਵੱਖ ਥੀਮ ਹਨ, ਪਹਿਲੀ ਸ਼੍ਰੇਣੀ ਵਿੱਚ ਬੱਚੇ ਆਪਣੇ ਮਨਪਸੰਦ ਕਾਰਟੂਨ ਕਿਰਦਾਰ, ਮਾਈ ਫੇਵਰੇਟ ਬਰਡਜ਼ ਐਂਡ ਐਨੀਮਲਜ਼ ਅਤੇ ਪੇਂਟਿੰਗ ਆਨ ਮਾਈ ਗ੍ਰੀਨ ਵਰਲਡ ਬਣਾ ਸਕਦੇ ਹਨ। ਦੂਜੀ ਸ਼੍ਰੇਣੀ ਵਿੱਚ, ਜੋ ਕਿ ਜਮਾਤ IV ਅਤੇ V ਦੇ ਵਿਦਿਆਰਥੀਆਂ ਲਈ ਹੈ, ਬੱਚੇ ਭਾਰਤ ਦੇ ਸਮਾਰਕਾਂ, ਪੇਂਡੂ ਜੀਵਨ ਅਤੇ ਧਰਤੀ ਨੂੰ ਬਚਾਉਣ ਦੇ ਵਿਸ਼ਿਆਂ ‘ਤੇ ਚਿੱਤਰ ਬਣਾ ਸਕਦੇ ਹਨ। ਤੀਜੀ ਸ਼੍ਰੇਣੀ ਵਿੱਚ ਭਾਰਤੀ ਤਿਉਹਾਰ, ਮਾਈ ਗ੍ਰੀਨ ਵਰਲਡ ਅਤੇ ਧਰਤੀ 20 ਸਾਲ ਬਾਅਦ ਥੀਮ ਹਨ। 9ਵੀਂ ਤੋਂ 12ਵੀਂ ਜਮਾਤ ਤੱਕ ਦੇ ਵਿਦਿਆਰਥੀਆਂ ਲਈ ਥੀਮ ਰੋਡ ਸੇਫਟੀ, ਫੈਸਟੀਵਲ ਆਫ਼ ਡੈਮੋਕਰੇਸੀ ਅਤੇ ‘ਹੈਰੀਟੇਜ ਆਫ਼ ਫ਼ਿਰੋਜ਼ਪੁਰ’ ਹਨ। ਓਪਨ ਵਰਗ ਲਈ ਵਿਸ਼ੇ ਅਧਿਆਤਮਿਕਤਾ, ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਅਤੇ ਸ਼ੇਡਜ਼ ਆਫ ਲਾਈਫ ਹੋਣਗੇ। 50 ਇਨਾਮਾਂ ਤੋਂ ਇਲਾਵਾ ਸਾਰੇ ਵਿਦਿਆਰਥੀਆਂ ਨੂੰ ਪੇਂਟਿੰਗ ਸ਼ੀਟਾਂ, ਰਿਫਰੈਸ਼ਮੈਂਟ ਅਤੇ ਭਾਗੀਦਾਰੀ ਸਰਟੀਫਿਕੇਟ ਵੀ ਵੰਡੇ ਜਾਣਗੇ।

 ਪੌਸਟਰ ਜਾਰੀ ਕਰਨ ਸਮੇਂ ਮਯੰਕ ਫਾਊਂਡੇਸ਼ਨ ਦੇ ਸਕੱਤਰ ਰਾਕੇਸ਼ ਕੁਮਾਰ, ਅਸ਼ਵਨੀ ਸ਼ਰਮਾ, ਡਾ: ਤਨਜੀਤ ਬੇਦੀ, ਸੰਦੀਪ ਸਹਿਗਲ, ਯੋਗੇਸ਼ ਤਲਵਾਰ, ਰਾਕੇਸ਼ ਮਾਹਰ , ਰਾਹੁਲ ਸ਼ਰਮਾ, ਜਤਿੰਦਰ ਸਿੰਘ, ਜਗਦੀਪ, ਤੁਸ਼ਾਰ, ਵਿਕਾਸ ਅਗਰਵਾਲ ਅਤੇ ਦੀਪਕ ਸ਼ਰਮਾ ਹਾਜ਼ਰ ਸਨ।