ਰੇਲਵੇ ਯਾਰਡ ਨੇੜਿਓਂ GRP ਵੱਲੋਂ 10.64 ਕਿਲੋ ਗਾਂਜਾ ਬਰਾਮਦ; ਅਣਪਛਾਤੇ ਖ਼ਿਲਾਫ਼ NDPS ਐਕਟ ਤਹਿਤ ਮਾਮਲਾ ਦਰਜ
ਰੇਲਵੇ ਯਾਰਡ ਨੇੜਿਓਂ GRP ਵੱਲੋਂ 10.64 ਕਿਲੋ ਗਾਂਜਾ ਬਰਾਮਦ; ਅਣਪਛਾਤੇ ਖ਼ਿਲਾਫ਼ NDPS ਐਕਟ ਤਹਿਤ ਮਾਮਲਾ ਦਰਜ
ਹਰਿਸ਼ ਮੋਂਗਾ
ਫਿਰੋਜ਼ਪੁਰ, 6 ਸਤੰਬਰ 2026: ਸਰਕਾਰੀ ਰੇਲਵੇ ਪੁਲਿਸ (GRP) ਵੱਲੋਂ ਨਸ਼ਾ ਤਸਕਰੀ ਨੂੰ ਰੋਕਣ ਅਤੇ ਸ਼ੱਕੀ ਵਿਅਕਤੀਆਂ ’ਤੇ ਨਜ਼ਰ ਰੱਖਣ ਲਈ ਚਲਾਈ ਜਾ ਰਹੀ ਚੈਕਿੰਗ ਮੁਹਿੰਮ ਦੌਰਾਨ ਰੇਲਵੇ ਯਾਰਡ ਇਲਾਕੇ ਵਿੱਚ ਰੇਲਵੇ ਪਟੜੀਆਂ ਨੇੜਿਓਂ ਇੱਕ ਲਾਵਾਰਿਸ ਪੈਕਟ ਵਿੱਚੋਂ 10 ਕਿਲੋ 64 ਗ੍ਰਾਮ ਗਾਂਜਾ ਬਰਾਮਦ ਕੀਤਾ ਗਿਆ।
ਪੁਲਿਸ ਅਨੁਸਾਰ, 6 ਸਤੰਬਰ ਨੂੰ ASI ਸੁਰਜੀਤ ਸਿੰਘ ਦੀ ਅਗਵਾਈ ਹੇਠ GRP ਦੀ ਟੀਮ, ਜਿਸ ਵਿੱਚ LR/ASI ਵਧਾਵਾ ਸਿੰਘ, ਹੈੱਡ ਕਾਂਸਟੇਬਲ ਅਮਰਜੀਤ ਸਿੰਘ, ਮਹਿਲਾ ਹੈੱਡ ਕਾਂਸਟੇਬਲ ਪਰਵਿੰਦਰ ਕੌਰ ਅਤੇ PHG ਅਜੈ ਕੁਮਾਰ ਸ਼ਾਮਲ ਸਨ, ਰੇਲਵੇ ਯਾਰਡ ਇਲਾਕੇ ਵਿੱਚ ਚੈਕਿੰਗ ਕਰ ਰਹੀ ਸੀ।
ਚੈਕਿੰਗ ਦੌਰਾਨ ਪੁਲਿਸ ਟੀਮ ਨੇ ਰੇਲਵੇ ਪਟੜੀਆਂ ਨੇੜੇ ਝਾੜੀਆਂ ਵਿੱਚ ਇੱਕ ਹਲਕੇ ਨੀਲੇ ਰੰਗ ਦਾ ਮੋਮ ਲੱਗਾ ਹੋਇਆ ਪੈਕਟ ਲਾਵਾਰਿਸ ਹਾਲਤ ਵਿੱਚ ਪਿਆ ਦੇਖਿਆ। ਸ਼ੱਕ ਹੋਣ ’ਤੇ ਪੁਲਿਸ ਵੱਲੋਂ ਪੈਕਟ ਦੀ ਤਲਾਸ਼ੀ ਲਈ ਗਈ, ਜਿਸ ਵਿੱਚੋਂ ਗਾਂਜਾ ਹੋਣ ਦਾ ਸ਼ੱਕੀ ਪਦਾਰਥ ਬਰਾਮਦ ਹੋਇਆ।
ਬਰਾਮਦ ਪਦਾਰਥ ਨੂੰ ਕੰਪਿਊਟਰਾਈਜ਼ਡ ਤੋਲ ਕੰਡੇ ’ਤੇ ਤੋਲਿਆ ਗਿਆ, ਜਿਸ ਦਾ ਕੁੱਲ ਵਜ਼ਨ 10 ਕਿਲੋ 64 ਗ੍ਰਾਮ ਪਾਇਆ ਗਿਆ।
ਪੁਲਿਸ ਨੇ ਬਰਾਮਦ ਨਸ਼ੀਲੇ ਪਦਾਰਥ ਨੂੰ ਕਬਜ਼ੇ ਵਿੱਚ ਲੈ ਕੇ ਅਣਪਛਾਤੇ ਵਿਅਕਤੀ ਖ਼ਿਲਾਫ਼ FIR ਨੰਬਰ 22, ਮਿਤੀ 6 ਸਤੰਬਰ 2026 ਤਹਿਤ NDPS ਐਕਟ ਦੀਆਂ ਧਾਰਾਵਾਂ 20/61/85 ਅਧੀਨ ਮਾਮਲਾ ਦਰਜ ਕਰ ਲਿਆ ਹੈ।
ਪੁਲਿਸ ਵੱਲੋਂ ਹੁਣ ਇਸ ਗੱਲ ਦੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਬਰਾਮਦ ਗਾਂਜੇ ਦੀ ਖੇਪ ਕਿੱਥੋਂ ਲਿਆਂਦੀ ਗਈ ਸੀ ਅਤੇ ਇਸ ਨੂੰ ਕਿਸ ਵਿਅਕਤੀ ਤੱਕ ਪਹੁੰਚਾਇਆ ਜਾਣਾ ਸੀ। ਮਾਮਲੇ ਦੀ ਅਗਲੇਰੀ ਜਾਂਚ ਜਾਰੀ ਹੈ।
