ਸਿਹਤ ਵਿਭਾਗ ਵਲੋਂ ਪ੍ਰਤੀਬੰਧਤ ਨਸ਼ੇ ਦੇ ਕੈਪਸੂਲ ਵੇਚਣ ਵਾਲੀਆਂ 4 ਦਵਾਈਆਂ ਦੀਆਂ ਦੁਕਾਨਾਂ ਦੇ ਲਾਈਸੈਂਸ ਰੱਦ
ਸਿਹਤ ਵਿਭਾਗ ਵਲੋਂ ਪ੍ਰਤੀਬੰਧਤ ਨਸ਼ੇ ਦੇ ਕੈਪਸੂਲ ਵੇਚਣ ਵਾਲੀਆਂ 4 ਦਵਾਈਆਂ ਦੀਆਂ ਦੁਕਾਨਾਂ ਦੇ ਲਾਈਸੈਂਸ ਰੱਦ
ਫ਼ਿਰੋਜ਼ਪੁਰ,24 ਦਸੰਬਰ, 2024: ਪੰਜਾਬ ਸਰਕਾਰ ਅਤੇ ਡਾ. ਅਭਿਨਵ ਤ੍ਰਿਖਾ ਕਮਿਸ਼ਨਰ , ਫ਼ੂਡ ਐਂਡ ਡਰੱਗ ਅਡਮਿਸਟ੍ਰੇਸ਼ਨ, ਪੰਜਾਬ ਦੇ ਦਿਸ਼ਾ ਨਿਰਦੇਸ਼ਾ ਹੇਠ ਚਲਾਈ ਗਈ ਨਸ਼ਾ ਵਿਰੋਧੀ ਮੁਹਿੰਮ ਦੇ ਤਹਿਤ ਨਸ਼ੇ ਦੇ ਪ੍ਰਤੀਬੰਧਿਤ ਕੈਪਸੂਲ ਵੇਚਣ ਕਰਕੇ ਫਿਰੋਜਪੁਰ ਅਤੇ ਮੋਗਾ ਜਿਲ੍ਹੇ ਦੇ 4 ਦਵਾਈਆਂ ਦੀਆਂ ਦੁਕਾਨਾਂ ਦੇ ਲਾਈਸੈਂਸ ਰੱਦ ਕਰ ਦਿੱਤੇ ਗਏ ਹਨ।
ਜੌਨਲ ਲਾਇਸੰਸਿੰਗ ਅਥਾਰਟੀ (ਡਰੱਗਜ਼ ਵਿੰਗ), ਫਿਰੋਜ਼ਪੁਰ ਜੌਨ ਵੱਲੋ ਸਖਤ ਕਾਰਵਾਈ ਕਰਦੇ ਹੋਏ ਡਰੱਗਜ਼ ਵਿਭਾਗ ਅਤੇ ਪੁਲਿਸ ਵਿਭਾਗ ਦੀ ਸਾਂਝੀ ਟੀਮ ਵੱਲੋਂ ਸਾਈ ਫਾਰਮੈਸੀ, ਪਿੰਡ ਰਾਊ ਕੇ ਹਿਥਾੜ ਜਿਲ੍ਹਾਂ ਫਿਰੋਜ਼ਪੁਰ, ਨਵੀਨ ਮੈਡੀਕੋਜ਼ ਸਾਹਮਣੇ ਸਿਵਲ ਹਸਪਤਾਲ ਮਮਦੋਟ ਜਿਲ੍ਹਾਂ ਫਿਰੋਜ਼ਪੁਰ ਅਤੇ ਮੋਗਾ ਜਿਲ੍ਹੇ ਦੇ ਅਡਵਾਂਸ ਮੈਡੀਕੋਜ਼, ਸਾਹਮਣੇ ਗੋਇਲ ਮਾਰਕੀਟ, ਮੋਗਾ ਅਤੇ ਪੰਜਾਬ ਮੈਡੀਕਲ ਸਟੋਰ, ਫ਼ਿਰੋਜਪੁਰ ਲੁਧਿਆਣਾ ਜੀ.ਟੀ.ਰੋਡ, ਮੋਗਾ ਦੇ ਲਾਇਸੰਸ 23 ਦਸੰਬਰ ਨੂੰ ਤੁਰੰਤ ਪ੍ਰਭਾਵ ਤੋ ਰੱਦ ਕਰ ਦਿੱਤੇ ਗਏ ਹਨ।
ਦਸਣਯੋਗ ਹੈ ਕਿ ਫਿਰੋਜ਼ਪੁਰ ਦੇ ਕਸਬਾ ਮਮਦੋਟ ਵਿੱਖੇ ਫਰਮਾਂ ਪਾਸੋ ਡਰੱਗਜ਼ ਇੰਨਸਪੈਕਟਰ ਸੋਨੀਆ ਗੁਪਤਾ ਵੱਲੋ ਚੈਕਿੰਗ ਕਰਕੇ ਨਸ਼ੇ ਦੇ ਤੌਰ ਤੇ ਦੁਰਵਰਤੋ ਕੀਤੀਆ ਜਾਣ ਵਾਲੀਆ ਦਵਾਈਆ (ਪ੍ਰੀਗਾਬਾਲੀਨ) ਆਦਿ ਜਬਤ ਕੀਤੀਆ ਗਈਆ ਸਨ ਅਤੇ ਇਨ੍ਹਾਂ ਫਰਮਾ ਵੱਲੋ ਡਰੱਗਜ਼ ਅਤੇ ਕਾਸਮੈਟਿਕ ਐਕਟ 1940 ਅਤੇ ਰੂਲਜ਼ 1945 ਦੇ ਤਹਿਤ ਜਬਤ ਕੀਤੀਆਂ ਗਈਆਂ ਦਵਾਈਆਂ ਦਾ ਖਰੀਦ ਅਤੇ ਵਿਕਰੀ ਰਿਕਾਰਡ ਨਹੀ ਰੱਖਿਆ ਗਿਆ। ਜਿਸ ਕਰਕੇ ਜੌਨਲ ਲਾਇਸੰਸਿੰਗ ਅਥਾਰਟੀ ਫਿਰੋਜ਼ਪੁਰ ਵੱਲੋ ਇਨ੍ਹਾਂ ਫਰਮਾਂ ਦੇ ਲਾਇਸੰਸ ਰੱਦ ਕਰ ਦਿੱਤੇ ਗਏ ਹਨ।
ਡਾ. ਰਾਜਵਿੰਦਰ ਕੌਰ,ਸਿਵਲ ਸਰਜਨ ਫਿਰੋਜ਼ਪੁਰ , ਸ੍ਰੀ ਲਖਵੰਤ ਸਿੰਘ, ਜੌਨਲ ਲਾਇਸੰਸਿੰਗ ਅਥਾਰਟੀ, (ਡਰੱਗਜ਼ ਵਿੰਗ) ਫਿਰੋਜ਼ਪੁਰ ਅਤੇ ਸ੍ਰੀਮਤੀ ਸੋਨੀਆ ਗੁਪਤਾ, ਡਰੱਗਜ਼ ਕੰਟਰੋਲ ਅਫਸਰ ਫਿਰੋਜ਼ਪੁਰ ਵੱਲੋ ਜਿਲ੍ਹੇ ਦੇ ਸਮੂਹ ਕੈਮਿਸਟਾਂ ਨੂੰ ਹਦਾਇਤ ਕਰਦਿਆਂ ਕਿਹਾ ਕਿ ਸਮੂਹ ਕੈਮਿਸਟਾਂ ਵੱਲੋ ਸਟਾਕ ਕੀਤੀਆ ਦਵਾਈਆ ਦਾ ਡਰੱਗਜ਼ ਰੂਲਜ਼ 1945 ਦੇ ਤਹਿਤ ਮੁਕੰਮਲ ਖਰੀਦ ਅਤੇ ਵਿਕਰੀ ਰਿਕਾਰਡ ਰੱਖਿਆ ਜਾਵੇ ਅਤੇ ਵਿਭਾਗ ਦੇ ਨਿਯਮਾਂ ਦੀ ਪਾਲਣਾ ਕੀਤੀ ਜਾਵੇ। ਜੇਕਰ ਕੋਈ ਵੀ ਕੈਮਿਸਟ ਪ੍ਰਤੀਬੰਧਿਤ ਦਵਾਈਆ ਬਿਨ੍ਹਾਂ ਖਰੀਦ ਅਤੇ ਵਿਕਰੀ ਰਿਕਾਰਡ ਤੋ ਬਿਨ੍ਹਾਂ ਰੱਖਦਾ ਪਾਇਆ ਗਿਆ ਤਾਂ ਉਨ੍ਹਾਂ ਕੈਮਿਸਟਾਂ ਖਿਲਾਫ਼ ਡਰੱਗਜ਼ ਵਿਭਾਗ ਵੱਲੋ ਸਖਤ ਕਾਰਵਾਈ ਕੀਤੀ ਜਾਵੇਗੀ।
